WÁJAH PANCHKUSH (Balochi Folktale) Hast at roch e, hast at rozgár e. Hast at mard e ki áyi y nám Wájah Panchkush at. Á yak bewas o nezgáren mard e at ki waty roch o rozgáry, yak kasánen halk e a pa puryágiry o muzz a gwázent. Yak roch e, wahd e ki Wájah Panchkush waty gis a átk o rasit, áyi y chamm pa panchen mushkány sará kapt ki garhoo y tahá murtag at ant. Mushky chá garhoo a dar kut ant, waty jany tawár kut o gwashty: -Zánán, tau nazánai ki many nám Wájah Panchkush int? Man kady int átkagon o tau man a áp o nagan e y just a ham nakanai? Latth e zurty o pa jan y janag a pád átk. Jan a waty mard, shar zánt. Á shewár o huzzháren janen e at. Pamishká dasty bast o gwashty: -Beshakk ki tayi nám Panchkush int, chyyá ki á panchen mushk tau jatag o kushtag ant. Á diga, yak mushk e ham jat nakan ant o tau panch dánag, yakken jáh a jatag o kushtag. Man chon tara namannon! Bazhn int ki é halkay bádsháh o áyi y ráj tará pajjáh nayárant o drust nakan ant. Agar, é jágah y badal a, tau diga bádsháh e y mulk a bootenai, tayi kadrish báz geshtir zánt. Man ham ásoodag o pa ásrát bootagatton. Wájah Panchkush a waty jan y é dhaulen satáh sakk wassh boot ant, báwary kut o waty dil a gwashty: -Pa rásty, man hame dhaulen mard e on o é warhen satáh karzon. Nazántyky ki jan a shigán jatag o pa kalág zurtag o é kalág, yak na yak roch e pa áyi a baláh bant. Wájah Panchkush cha hame satáhán garm gipt o yak pád y sar a oshtát ki: -é shahr a bllen o digah bádsháhy mulk e a brauen. Harchi ki jan a yngur o ángur kut Wájah Panchkush a namannit. Non jan bewass boot o waty nipád o bunddhak zurt o har y sar a kut ant o, hardo cha é shahr á dem pa diga shahr e rahádag boot ant. Diga bádsháhy mulk e a átk o rasit ant. Pa wat yak kuddhul e bast o likk ish kot. É shap ish roch boot o bámgwáh a Wájah Panchkush a waty barot charp kut o táb dát ant. Bádsháh y dywán a shut, kamarzányg e basty o nisht. Bádsháh a wasshátk kut o námai just gipt. Wájah Panchkush a waty nám gwasht. Bádsháh a áyi y chushen náma y máná jost kut. Áyi a darráyent ki: Man panch mazár yakjáh a, yak roch e a jatag o kushtag ant. Bádsháh báz wassh boot o panch marday pagáry pa áyi a bakshát. Non Wájah Panchkush pa yak thahl o shán e gis a shot o waty sajjahen hál o hawály pa jan a sar kutant. Hamá begáh a, áyi a márhyány hunarkár o thahenok lothit ant o yak márhy e y bandag a parmán dát ant. Chyz e zarry ham pesará dát ant ki cha sabáh a báyad ent mánrhy y kár a blagg ant o guláyesh bbant. Non Wájah Panchkush a, har roch waty barot charp o chang kut ant o bádsháh y dywán a shot. Yak roch e nigahpán a bádsháh hál dát: Chunt wahd int ki apsány galag y kurragány sará yak mazár e kaptag. Har shap kait o do sai kurrag a gipt o wárt. Bádsháh y wazyr o wakylán gon wat shaur kut, tán bádsháh a bgwash ant: Pa é mazár y girag o kushag a, Wájah Panchkush á parmán bdant ki á panch mard y pagár a muptá gipt o wárt. Bádsháh a Wájah Panchkush lotháyent o gwashty: Yak mazár e hel geptag, har shap a kait o cha sháhy galag y kurragán do sai dánag a gipt o wárt. Ubed cha tau, waty darbár a diga mard e nagindon ki mára cha é baláh a bchutthenyt. Wájah Panchkush a waty barot táb dát ant o gwashty: O bádsháh! É wa kár e na int, balken cha ishy á saktiren kár ham pa man hicch na ant. Mard e ki cha panch mazár y kushag á bajj nawárt o thappyg nabit, é yakken mazár y kushag pa áyi a kár e na int. Dywán a jass dát o shábásh kut. Gurha dywán prusht. Wájah Panchkush mallán mallán a, dem pa waty gis a shot. Gon rasag a, latthy zyrt o jan y janag á pád átk. Jan a gwasht: Tará chon ent ki mupt y huda pa many janag a lánkit bastag? Áyi a gwasht: Tau mana chush wár o darpadar kutag. Agar tau many nám Wájah Panchkush mayeshten o á wasp o satáh makuten ant, marochy, é baláh many sará nakapt. Jan a gwasht: Non gapp chy int? Gwashty: Tayi shoomrochy! Marochy bádsháh a gwashtag ki yak mazár e har shap kait o áyi y apsány kurragán a wárt. Non man a pa áyi y girag o kushag a parmán dátagy o man a lothyt pa har dáb mantag, á mazár a bgiron o zindag a bádsháh a pesh bdáron. O názántkáren jan! Many pit o pyrenan kady mazár zindag a giptag tán many báryg byt? Jan a darráyent: Bádsháh tará panch marda y pagár mupt a na dant. Á roch ki man tará mán waty halk a gwasht, tau namannit o pádit yak kaush a kutant ki man mazárkushány bacchon. Pa many janag a latthit chit o pád átkai o laddh o bár kanagai parmánit dát. Non ki ynchok zarr a girai, báyad int ki bádsáh y parmán a bmannai. Non Wájah Panchkush tap a gipt o gwashty: -Man á nipád o lihep e hách bdai ki tapygon. Bale jan a dilbaddhy dát o gwashty: Zut kan, har e dargej, tán waty bár o bunag a bladdhen o cha idán brauen. Wájah Panchkush shap y nemá pa har y padjanag a shut. Cha kaz a, bzán é hamá wahd at ki mazár ham pa kurragány warag a átkag. Achánag gon Wájah Panchkush a dhykky wart. Bale shap tahár at o Panchkush a pa sharry a nadist. Áyi a pigr kot balken har e. Gon halgar o halabásh, dasty jat o har doen gosh yi sakk muhr dásht ant. Kasshakány kut o pa log á burty. Jan a gwánk jat: -Gon zamzyl e muhr bbandy, masindit o maraut ki bándá hairán bayen. Wájah Panchkush a ham dast o pády gon zamzil a muhr bast ant. Mazár a gon wat gwasht: É chonen baláh e ki many goshy har y gosh y dhawl a giptant o girr kanán pa é ásány áwort o bast? Betwár boot o hicch na surit. Yak wahd e jan pád átk tán bazzagen har a káh o kadym e bdant, tán yakbará chammy pa mazár á kapt. Setth e koty o turs e áyi y ján a kapt. Bale waty tursy cha Panchkush á cher dát o wapt. Rochthikk a, wahd e ki Wájah Panchkush cha wáb a pád átk o dhann a dar boot, chammy ki pa mazár a kapt, zánty ki áyi a har y jáh a hama mazár giptag. Jány larzag a laggit. Zoot shot lihep e háchy kut o wapt, bale wáb nakapt. Jan a har chy dilbaddhy o diljamy dát, áyi a namannit o gwashty: -Maná tursit. Suhb y sará, jan a mardom e kalát a rawán kot dán bádsháh a bgwash ant ki Wájah Panchkush a mazár giptag, byáyant o áyi a bbarant. Chya ki Wájah Panchkush a doshy cha mazár y jang a damburtag o non waptag o wat átk nakant. É hál ki bádsháh a sar boot, gon waty drostygen wazyr o gazyrán Wájah Panchkush y jágah a átk. Mazár ish dyst ki áyi y mánrhy kash a yak kirr e gon zamzilán bastag. Mazár ish gipt o burt. Begáh a Wájah Panchkush a waty pucch o dares badal kotant, baroty charp kut ant o bádsháh y bárgáh a shut. Bádsháh, gon wazyr o gazyrán áyi y demá pád átk o cha har kash o kirrá, jass o shábásh macchit. Non bádsháh a dah marda y inám pa Wájah Panchkush a bakshát. Lahten roch a rand, mardomán bádsháh hál dat: -Chont shap int ki hapt duzz o rahgyr har shap shahr a rich ant o dukkán o gisán jan ant o pul ant. É diga roch a bádsháh a Wájah Panchkush lothayent o pa rahgyrány girag o janag a parmán dát. Wájah Panchkush pada tap a gipt, bazzag o lunth hushk, jan y kirr a átk o pa áyi y janag a pád atk. Jan a gon turs o larz e hál o hawál kut o Wájah Panchkush a waty noken griptáry gwasht. Jan a darráient: Gam makan! Brau mulk y bápáry a panjáh kalladár bdai o áyi y gud o pucchán gon hurjyn a, pa yak roch e y wásta bgir. Wájah Panchkush a jan y habar zurt o bápáry y pucch o hurjyny áwort ant. Non, jan a árt tarr kut o kammen zahry mán ártán ritk. Bázen roginy nán e ham patky o hurjyn y tahá isht ant. Pucchy ham Wájah Panchkush y gwar a dát ant. Wájah Panchkush dem pa yak nemag e sargipt o shot. Anchush rawaga at ki anágat ráh a gon hapten duzzán dochár kapt. Áyán ki Wájah Panchkush gon á pucch o daresán o á hurjyn a dyst, gwasht ish: -Alle bacha, bgiryty ki bápáry e, gon purren hurjyn a. Sakk gal boot ant. Rahgyrán urush kut o Wájah Panchkush gipt o bast. Hurjyn ish, jahl a ergitk o drustygen nán ish wárt ant. Zahrá waty kár kut o har hapten dozz murt ant. Wájah Panchkush ham mahtal naboot o har haptenány sary zurt o dem pa wáty metag á berauy kut. Shap gwast o roch boot. Sabáh a pa yak gal o bál e bádsháh y darbár a shot. Drod o drahbát e kuty o gwashty: Wájah! Man har hapten rahgyr kusht ant o sar áwort ant. Bádsháh báz wassh but o cha har nemag a jass o shábásh burz boot. Bádsháh a noon byst mard y pagár pa Wájah Panchkush a bakshát. Yak roch e, diga mulk e y bádsháh a, é mulk y bádsháh pa jang o mirh gwájárent. Bádsháh a dháh pirrent, wazyr o gazyr parmán dátant tán gon Wájah Panchkush y hamráhy a pa jang y sambárag a ráh o chárag e dar bgej ant. É randá, bazzagen Wájah Panchkush y dap zahrtir o lonth hushktir, gis a átk o cha hamá door a, gon haizárán a, bad o beráh gwashán a, pa jan y janag a lánchity. Gurrán o nurundhán gwashag a at: -Sher o mazárán bill, ki non bádsháhany jang on sará kaptag. Jan a pa hazár badbahty wata cha áyi y latthán dar o dast kut o cha Wájah Panchkush a hál o hawál y maksady just kut. Wahd e ki zánty habar chy int, non áyi a dildáry o dilbaddhy dáty o gwashty: -Delá mawar o gam makan, diljam bay ki Wájah Panchkush e gashtá ham soben bit. Bámgwáh a, wahd e ki mardomány mucch kanag o jang y sorenag y tabl o trumbány twár macch it, nigahpánán yak sarmast o trunden aps e gon tangawen sanján pa Wájah Panchkush a áwort o rasent. Wájah Panchkush a gwasht: Bádsháh gon waty sipáh a demá braut o rahádag bgypt, man wat á zoot rasenon. Jan a Wájah Panchkush gipt, zen y sará nádent, yak gudy táká e zurt o gon aps y zen o tang a chikkit o sakk muhr bast o bory pa táchag a hai kot. Naryán ki tán é wahdy áyi y posht a kas swár nabootag at, á cho gwátkol a gwazán o traddán, dem pa jangy lashkar y srapá ráh kapt. Har doen bádsháhány lashkar dem pa dem jang a at ant ki Wájah Panchkush y naryán pa drikk e cha yak kirr e a sirrán a pedág at. Naryán y girodár cha Wájah Panchkushay dastá dar at, jaumast o wakábbalen aps cha yak drachk e y cher a gwast. Wájah Panchkush y dil cha turs á cher tarritag at, drachky bagal kut, bale cha naryán y bázen zor a, drachk cha bun a dar átk o Wájah Panchkush y bagal a mant. Áyi a ham drachk yalah nadát. Naryán besár o besamá dem pa dushman y sipáh a tachán at. Wájah Panchkush a tahná chyz e ki dap a at, é gál at: -Kapt on, kapt on, bdárit, ki kapt on! Cha kazá o páken kádir y zor a, Wájah Panchkush y baht purzor at o doshmanen bádsháh y nám “Kapton” at. Áyi y sipáh o jindá dist ki pahlawán e a baláhen drachk e bagal a int o bor táchán, bádsháh y námá girán int o dem pa áyi a pedák int. Dushman y sipáh, cha turs a diltrakk boot o tatk. Mirh y patth yalah dát o lashkar á prosh wárt. Non Wájah Panchkush y bádsháh a sob kut o dem pa waty kalát á shut. É darmayán a, Wájah Panchkush pesar cha áyán, waty log a átk o rasit. Jan a cha aps y sar a er gipt, pucch o poshák badal kut ant o tás e ápy wárent É diga sabáh a, bádsháh a dywán e barjáh dásht o mazanen jashn e gipt. Bádsháh a, á waty kirrá nádent. Non, Wájah Panchkush, yak mazanen, purmarháyen mard e at ki bádsháh y rásty kassh a nendok at.
